App डाउनलोड करा

संपादकीय धोरण

Study Katta संपादकीय टीम · अद्ययावत: 18 नोव्हेंबर 2026

studykatta.com वरील मजकूर कसा निवडला, लिहिला, तपासला आणि दुरुस्त केला जातो — हे या पानावर आहे. हे धोरण चालू घडामोडी, डेली टेस्ट, भरती अपडेट, मार्गदर्शक लेख आणि Revision Kit या सगळ्यांना लागू आहे.

1. बातम्या कशा निवडतो

आमचा एकच निकष आहे: ही बातमी स्पर्धा परीक्षेत विचारली जाऊ शकते का? त्यामुळे आम्ही प्राधान्य देतो —

  • केंद्र व महाराष्ट्र शासनाचे निर्णय, योजना, कायदे आणि धोरणे;
  • महत्त्वाच्या नियुक्त्या, पुरस्कार, अहवाल आणि निर्देशांक;
  • अर्थव्यवस्था, विज्ञान-तंत्रज्ञान, अंतराळ, संरक्षण, पर्यावरण आणि क्रीडा;
  • भारताचे आंतरराष्ट्रीय संबंध आणि महत्त्वाच्या जागतिक घडामोडी;
  • महाराष्ट्राशी संबंधित बातम्या — कारण आमचे वाचक महाराष्ट्रातील परीक्षा देतात.

राजकीय मतप्रदर्शन, अफवा, गुन्हेगारी किंवा सनसनाटी बातम्या आम्ही घेत नाही.

2. अधिकृत स्रोत

शक्य तिथे आम्ही मूळ, अधिकृत स्रोत वापरतो: पत्र सूचना कार्यालय (PIB), केंद्रीय मंत्रालये व विभाग, महाराष्ट्र शासनाचे निर्णय (GR) व प्रसिद्धीपत्रके, भारतीय रिझर्व्ह बँक, इस्रो, निवडणूक आयोग, MPSC व UPSC, संयुक्त राष्ट्रे व त्यांच्या संस्था, आणि अधिकृत क्रीडा महासंघ. प्रतिष्ठित वृत्तसंस्थांचा वापर पूरक म्हणून करतो. बातमीच्या शेवटी स्रोत लिहिलेला असतो; प्रकाशकाची link उपलब्ध असेल तर तीही दिली जाते.

3. लेखन

  • प्रत्येक बातमी मराठीत, आमच्या शब्दांत लिहिली जाते. मूळ बातमी किंवा लेख आम्ही शब्दशः कॉपी करत नाही.
  • प्रत्येक बातमीसोबत आमचे स्वतःचे भाग असतात: परीक्षेसाठी महत्त्वाचे मुद्दे, मूलभूत ज्ञान आणि हे का महत्त्वाचे.
  • शीर्षक बातमीतील तथ्य सांगते; वाचकाला फसवणारे किंवा अतिशयोक्त शीर्षक आम्ही लिहित नाही.
  • डेली टेस्टचे प्रश्न त्याच दिवसाच्या बातम्यांवर असतात आणि प्रत्येक प्रश्नासोबत उत्तर व स्पष्टीकरण असते.

4. तथ्य-तपासणी

  • आकडे, तारखा, नावे, पदनामे आणि ठिकाणे प्रसिद्ध करण्यापूर्वी स्रोताशी जुळवली जातात.
  • दोन स्रोतांमध्ये फरक असेल, तर अधिकृत स्रोत ग्राह्य धरला जातो.
  • जी माहिती अजून निश्चित नाही ती आम्ही निश्चित असल्यासारखी लिहित नाही — "अपेक्षित", "प्रस्तावित" असे स्पष्ट लिहितो.
  • मार्गदर्शक लेख अधिकृत जाहिरात व परीक्षा योजनेवर आधारित असतात; लेखात स्रोत आणि तारीख दिलेली असते. पडताळणी पूर्ण होईपर्यंत लेख प्रसिद्ध होत नाही.

5. भरती माहिती

भरती अपडेटमध्ये आम्ही अधिकृत जाहिरात वाचून मुख्य माहिती थोडक्यात देतो आणि प्रत्येक नोंदीसोबत अधिकृत संकेतस्थळ किंवा जाहिरातीची link देतो. आयोग किंवा भरती मंडळ शुद्धिपत्रक काढून तारखा व पदसंख्या बदलू शकते; त्यामुळे अर्ज करण्यापूर्वी अधिकृत जाहिरातच अंतिम माना. आम्ही अर्ज स्वीकारत नाही आणि भरती प्रक्रिया राबवत नाही.

6. साधनांचा वापर

मसुदा, भाषांतर आणि मांडणीसाठी आम्ही सॉफ्टवेअर साधनांचा वापर करू शकतो. मात्र काय प्रसिद्ध करायचे हे संपादकीय टीम ठरवते, आणि प्रसिद्ध होणारा प्रत्येक मजकूर या धोरणातील तथ्य-तपासणीतूनच जातो.

7. दुरुस्ती

चूक लक्षात आली किंवा कोणी कळवली, तर आम्ही ती स्रोताशी तपासतो आणि खरी असल्यास त्या पानावर दुरुस्त करतो. चालू घडामोडींच्या पानावरील "अद्ययावत" तारीख बदल झाल्यावर बदलते. डेली टेस्टमधील चुकीचे उत्तर दुरुस्त केले जाते, आणि गरज असल्यास प्रश्न काढून टाकला जातो.

8. चूक कशी कळवायची

Email: studykattaapp@gmail.com — विषयात "दुरुस्ती" आणि त्या पानाची link लिहा; काय चुकीचे आहे आणि बरोबर माहितीचा स्रोत सांगा.
WhatsApp: संदेश पाठवा

साधारणपणे 1–2 कामकाजाच्या दिवसांत आम्ही उत्तर देतो. कॉपीराइट किंवा मजकूर हटवण्याच्या विनंतीसाठी हे पान वापरा.

9. जाहिरात व संपादकीय स्वातंत्र्य

वेबसाइट व ॲपवर जाहिराती दिसू शकतात. कोणती बातमी घ्यायची किंवा काय लिहायचे हे जाहिरातदार ठरवत नाहीत. भविष्यात प्रायोजित मजकूर प्रसिद्ध केला तर तो "प्रायोजित" असे स्पष्ट लिहूनच केला जाईल. Study Katta ही शासकीय संस्था नाही — अस्वीकरण पाहा.